काठमाडौं। नेकपा एमालेभित्र कोशी प्रदेश सरकारको नेतृत्वलाई लिएर विवाद चुलिँदै गएपछि पार्टी अध्यक्ष केपी शर्मा ओलीले मुख्यमन्त्री हिक्मत कार्कीलाई छलफलका लागि काठमाडौं बोलाएका छन्।

पार्टी महासचिव शंकर पोखरेलमार्फत अध्यक्ष ओलीको सन्देश पाएपछि मुख्यमन्त्री कार्की मंगलबार काठमाडौं जाँदैछन्। मुख्यमन्त्री निकट स्रोतका अनुसार काठमाडौंमा अध्यक्ष ओली, महासचिव पोखरेलसहित शीर्ष नेताहरूबीच हुने छलफलले कार्कीको नेतृत्व निरन्तर रहने वा नयाँ नेतृत्व चयन हुने विषयमा निर्णय गर्ने अपेक्षा गरिएको छ।

एमालेभित्र अध्यक्ष ओली कोशी प्रदेशको नेतृत्व परिवर्तन गरी संसदीय दलका उपनेता तिलकुमार मेन्याङ्बोलाई मुख्यमन्त्री बनाउने पक्षमा रहेको चर्चा छ। तर मुख्यमन्त्री कार्कीले भने राजीनामा नदिने अडान कायम राख्दै आएका छन्। उनले व्यक्तिगत निर्देशनभन्दा पार्टीको संस्थागत निर्णयलाई मात्र स्वीकार गर्ने बताएका छन्।

सोमबार विराटनगरस्थित एमाले प्रदेश कार्यालयमा आयोजित संसदीय दल र प्रदेश नेतृत्वको बैठकपछि सञ्चारकर्मीसँग कुरा गर्दै कार्कीले अध्यक्ष ओलीबाट पद छाड्न कुनै प्रत्यक्ष निर्देशन नपाएको दाबी गरेका थिए।

उनले आफू संविधानको धारा १६८ को उपधारा (५) अनुसार प्रदेश सभाको बहुमतको विश्वासका आधारमा मुख्यमन्त्री बनेको उल्लेख गर्दै सरकार संवैधानिक प्रक्रियाअनुसार नै अघि बढ्ने बताएका छन्। काठमाडौंमा हुने शीर्ष तहको छलफलपछि कोशी प्रदेश सरकारको नेतृत्वबारे स्पष्ट निर्णय आउने अपेक्षा गरिएको छ।