Red Voice Nepal

Category: National

बागमती सरकार ६ मन्त्रीको सामूहिक राजीनामा: एमाले बाहिरियो

हेटौँडा। बागमती प्रदेश सरकारमा नयाँ राजनीतिक समीकरणको प्रभाव देखिन थालेको छ। सरकारमा सहभागी नेकपा (एमाले) का सबै ६ मन्त्रीले मंगलबार सामूहिक रूपमा राजीनामा दिएका छन्। साथै एमालेले सरकारलाई दिएको समर्थन पनि औपचारिक रूपमा फिर्ता लिएको छ।

एमाले बागमती प्रदेश संसदीय दलका नेता जगन्नाथ थपलिया ले मुख्यमन्त्री इन्द्रबहादुर बानियाँ लाई सम्बोधन गर्दै पठाएको पत्रमार्फत वर्तमान राजनीतिक परिस्थिति र पार्टीको निर्णयअनुसार सरकारमा रहेका सबै मन्त्रीले तत्काल प्रभावबाट पद त्याग गरेको जानकारी गराएका हुन्। पत्रमा राजीनामा स्वीकृत गरी आवश्यक संवैधानिक तथा कानुनी प्रक्रिया अघि बढाउन आग्रह गरिएको छ।

थपलियाले सरकारप्रतिको समर्थन पनि फिर्ता लिइएको पुष्टि गर्दै अब एमाले प्रतिपक्षको भूमिकामा रहने संकेत दिएका छन्।

राजीनामा दिने मन्त्रीहरूमा कृषि, पशुपन्छी, वन तथा वातावरण मन्त्री मधुसुदन पौडेल, भौतिक पूर्वाधार विकास मन्त्री डा. दिनेशचन्द्र देवकोटा, यातायात हेर्ने मन्त्री जयराम थापा, वन तथा वातावरण हेर्ने मन्त्री भरतबहादुर केसी, स्वास्थ्य हेर्ने मन्त्री किरण थापा तथा उद्योग, पर्यटन, श्रम तथा यातायात मन्त्री बिन्दु श्रेष्ठ रहेका छन्।

यसअघि मन्त्रिपरिषद् बैठकपछि काठमाडौं फर्किएका मन्त्रीहरू मंगलबार राति विशेष रूपमा हेटौँडा पुगेर सामूहिक रूपमा राजीनामा बुझाएका हुन्।

मन्त्री मधुसुदन पौडेलका अनुसार एमाले अध्यक्ष केपी शर्मा ओली र नेकपाका संयोजक पुष्पकमल दाहाल ‘प्रचण्ड’ बीच प्रदेश सरकारहरूको सत्ता सहकार्यबारे भएको छलफलपछि पार्टी नेतृत्वले सरकारबाट बाहिरिन स्पष्ट निर्देशन दिएको थियो।

साउन २०८१ देखि नेपाली कांग्रेस र एमालेको संयुक्त नेतृत्वमा सञ्चालन हुँदै आएको बागमती सरकार एमालेको समर्थन फिर्तासँगै अल्पमतमा परेको छ। अब संविधानअनुसार मुख्यमन्त्री इन्द्रबहादुर बानियाँले ३० दिनभित्र प्रदेशसभाबाट विश्वासको मत लिनुपर्ने संवैधानिक बाध्यता रहेको छ।

राजनीतिक विश्लेषकहरूका अनुसार एमालेको यो निर्णयले बागमती प्रदेशको सत्ता समीकरण मात्र होइन, अन्य प्रदेशको राजनीतिक समीकरणमा पनि प्रभाव पार्न सक्ने देखिएको छ।

July 22, 2026
दुई बोरा मल ल्याउँदा भारतीय जेल पुगे सर्लाहीका दुई किसान, खेत बाँझै

काठमाडौं। विगतका वर्षहरूमा यतिबेलासम्म सर्लाहीको बलरा नगरपालिका–५ का ५५ वर्षीय सुरेशप्रसाद सिंह र ६० वर्षीय नागेन्द्रप्रसाद सिंहले आफ्नो साढे २ बिघा खेतमा रोपाइँ सकिसक्थे। तर यसपालि उनीहरूको खेत बाँझै छ भने दुवै दाजुभाइ २० दिनदेखि भारतीय जेलमा थुनिन बाध्य भएका छन्।

देशभित्रै समयमा मल नपाएपछि रोपाइँका लागि मलको जोहो गर्न उनीहरू सीमावर्ती भारतीय बजार सोनवर्षा पुगेका थिए। त्यहाँबाट खरिद गरेर साइकलमा ल्याउँदै गरेको २ बोरा युरिया र ६ बोरा डीएपीसहित उनीहरूलाई गत १७ असारमा भारतीय कृषि विभाग र सशस्त्र सीमा बल (एसएसबी) को संयुक्त टोलीले ‘मल तस्करी’ को आरोपमा पक्राउ गरेको हो।

पक्राउ परेका दुवै दाजुभाइलाई सुरुमा सोनवर्षा थानामा राखिएको थियो। हाल उनीहरूलाई सीतामढी जिल्लाको डुमरास्थित कारागारमा पठाइएको छ।

झन्झटिलो कानुनी प्रक्रिया र अन्योल
थुनामा रहेका नागेन्द्रका ज्वाइँ प्रवीन सिंहका अनुसार डुमरास्थित स्थानीय अदालतले २५ असारमा सोनवर्षा प्रहरीबाट घटनाको विवरणसहितका कागजात मगाएको भए पनि अहिलेसम्म धरौटी (बेल) मा छुट्न सकेका छैनन्।

”अदालतका न्यायाधीश बिदामा रहेकाले अदालती प्रक्रियामा ढिलासुस्ती भइरहेको छ,” प्रवीनले भने, “हामी निरन्तर धाउन भने छाडेका छैनौं।”
पारिवारिक स्रोतका अनुसार थानाबाट अदालतसम्म कागजात पुगे पनि भारतको झन्झटिलो र ढिलासुस्तीपूर्ण कानुनी प्रक्रियाका कारण उनीहरूको रिहाइमा अन्योल थपिएको छ।

यसैबीच, सर्लाहीका प्रमुख जिल्ला अधिकारी विजयराज सुवेदीले दुवै किसान दाजुभाइ भारतमा पक्राउ परेको विषयमा गृह मन्त्रालयलाई औपचारिक रूपमा जानकारी गराइसकिएको बताएका छन्।

July 21, 2026
महोत्तरी र धनुषाको कार्यक्रमका लागि प्रचण्ड आज जनकपुर जाने

काठमाडौं। नेपाली कम्युनिष्ट पार्टी (नेकपा) का अध्यक्ष पुष्पकमल दाहाल ‘प्रचण्ड’ आज दिउँसो हवाईमार्गबाट जनकपुरधाम जाने भएका छन्। पार्टीले दिएको जानकारी अनुसार उनी दिउँसो ४ बजे जनकपुर आइपुग्ने कार्यक्रम रहेको छ।

जनकपुर पुगेपछि अध्यक्ष प्रचण्ड महोत्तरीको रामगोपालपुर जानेछन्। त्यहाँ उनी पूर्व संविधानसभा सदस्य स्वर्गीय ललेन्द्र मण्डलको पुण्यतिथिका अवसरमा आयोजित कार्यक्रममा सहभागी हुनेछन्। महोत्तरीको कार्यक्रम सकेर जनकपुरधाम फर्किएपछि उनले मधेश प्रदेशका पार्टी नेताहरूसँग विशेष छलफल गर्ने कार्यक्रम तय भएको छ।

पार्टीका अनुसार उक्त छलफलमा,केन्द्रको राजनीतिक परिस्थिति: पछिल्लो राजनीतिक घटनाक्रम र केन्द्रमा बन्न लागेको नयाँ तीनदलीय गठबन्धनबारे जानकारी गराइनेछ।

प्रदेशमा प्रभाव र रणनीति: नयाँ गठबन्धनले मधेशको राजनीतिमा पार्ने प्रभावका साथै बदलिँदो परिस्थितिमा पार्टीको भावी रणनीति र भूमिकाबारे विचार-विमर्श हुनेछ।
संगठन सुदृढीकरण: केन्द्रीय समीकरण परिवर्तनको पृष्ठभूमिमा प्रदेशभित्र पार्टी संगठनलाई एकीकृत र थप सक्रिय बनाउने विषयमा छलफल गरिनेछ।

यस्तै, प्रचण्डले बुधबार जनकपुरधामस्थित महेन्द्र नारायण निधि सांस्कृतिक भवनमा आयोजना हुने मधेश प्रदेशस्तरीय प्रशिक्षण, एकता समायोजन तथा शपथग्रहण कार्यक्रमलाई मुख्य वक्ताका रूपमा सम्बोधन गर्नेछन्।

उक्त प्रदेशस्तरीय कार्यक्रमका लागि पार्टीले प्रदेश कमिटीका पदाधिकारी, जिल्ला नेतृत्व तथा जनवर्गीय संगठनका प्रतिनिधिहरूलाई अनिवार्य उपस्थित हुन निर्देशन दिएको छ।

July 21, 2026
प्रचण्ड र माधव नेपालबीच भेटवार्ता: एमालेसँग नयाँ सत्ता समीकरण बनाउन दुवै नेता सहमत

काठमाडौँ। नेपाली कम्युनिष्ट पार्टी (नेकपा) का संयोजक पुष्पकमल दाहाल ‘प्रचण्ड’ ले सहसंयोजक माधवकुमार नेपालसँग उहाँकै निवास कोटेश्वर पुगेर भेटवार्ता गर्नुभएको।

केही दिनदेखि अस्वस्थ रहनुभएका सहसंयोजक नेपाललाई भेट्न संयोजक प्रचण्ड बिहान करिब ९ बजे कोटेश्वर पुग्नुभएको हो। भेटमा प्रचण्डले नेपालको शीघ्र स्वास्थ्यलाभको कामना गर्दै देशको पछिल्लो राजनीतिक अवस्था र नयाँ सत्ता समीकरणबारे गहन छलफल गर्नुभएको छ।

श्रीलंका भ्रमणबाट फर्किएलगत्तै प्रचण्ड नयाँ राजनीतिक योजना र सत्ता समीकरणको गृहकार्यमा तीव्र रूपमा जुट्नुभएको हो। प्रचण्ड श्रीलंकामा रहेकै समयमा सहसंयोजक नेपालले नेताहरू वर्षमान पुन र प्रमेश हमाललाई नयाँ समीकरणका लागि संवाद गर्ने जिम्मेवारी दिनुभएको थियो। सोही क्रममा उहाँहरूले नेकपा एमालेका अध्यक्ष केपी शर्मा ओलीसँग लामो छलफल गर्नुभएको थियो भने नेपाली कांग्रेसका सभापति गगन थापासँग भने त्यस्तो छलफल हुन सकेको थिएन।

प्रचण्ड फर्किएलगत्तै पुन र हमालले विकसित घटनाक्रमबारे जानकारी गराउनुभएको थियो। सोही जानकारीका आधारमा आज बिहान सहसंयोजक नेपाललाई भेटेपछि प्रचण्डले प्रमेश हमाल, वर्षमान पुन, बेदुराम भुसाललगायतका नेताहरूसँग गठबन्धनबारे टुङ्गो लगाउनुपर्ने विषयमा थप परामर्श गर्नुभएको थियो।

एमालेसँग सहकार्य गर्ने निष्कर्ष
नेकपा स्रोतका अनुसार संयोजक प्रचण्ड र सहसंयोजक नेपाल दुवै जना अब नेकपा एमालेसँगको सहकार्यलाई अगाडि बढाउने निष्कर्षमा पुग्नुभएको छ। पार्टीका अधिकांश नेता तथा कार्यकर्ताहरूले आगामी स्थानीय तह र प्रदेशको निर्वाचनमा समेत कम्युनिष्ट शक्तिहरू एक भएर जाने वातावरण बनाउन नेतृत्वलाई दबाब दिँदै आएका छन्।

प्रदेशमा तीनदलीय गठबन्धन बनाउन नेकपा र एमाले तयार भए पनि कांग्रेसले दुईदलीय अडान नछाडेपछि कांग्रेससँगको संवाद पातलिँदै गएको थियो। एमाले–कांग्रेस गठबन्धन अघोषित रूपमा टुटिसकेको अवस्थामा दुवै दलका नेता-कार्यकर्ता कम्युनिष्ट आन्दोलन जोगाउन एमाले-नेकपा गठबन्धनको पक्षमा उभिएका हुन्।

शीर्ष नेताहरूबाट सकारात्मक सङ्केत पाएपछि प्रचण्ड आजै एमाले अध्यक्ष केपी शर्मा ओलीसँग निर्णायक वार्ता गर्ने तयारीमा जुट्नुभएको छ।
”संयोजक कमरेडले सहसंयोजक कमरेडलाई घरमै पुगेर भेटेर सबै विषयमा कुराकानी गर्नुभएको छ। आज एमाले अध्यक्षलाई पनि भेटेर निर्णायक कुरा गर्ने उहाँको तयारी छ, छिट्टै सबै विषयको टुंगो लाग्छ,” प्रचण्डनिकट उच्च स्रोतले भन्यो।

July 20, 2026
कांग्रेस सत्ताका लागि सिद्धान्तमा सम्झौता गर्दैन: गगन थापा

ललितपुर, ४ साउन। नेपाली कांग्रेसका सभापति गगन थापाले प्रदेशहरूमा प्रमुख तीन दल मिलेर सरकार बनाउने प्रस्ताव आएको खुलासा गर्दै कांग्रेसले त्यस्तो प्रस्ताव स्वीकार नगर्ने स्पष्ट पारेका छन्। ललितपुरमा आज आयोजित ‘नयाँ पुस्तासँग नेपाली कांग्रेसका सभापति साक्षात्कार तथा कृष्णप्रसाद भट्टराईको सालिक अनावरण’ कार्यक्रममा बोल्दै उनले यस्तो बताएका हुन्।

नेपाली कांग्रेस, नेकपा एमाले र माओवादी केन्द्र (वा अन्य कम्युनिस्ट पार्टी) मिलेर प्रदेशहरूमा सरकार गठन गर्ने प्रस्ताव आएतर्फ सङ्केत गर्दै उनले यो नागरिकको जनमतविपरीत हुने टिप्पणी गरे।

”अहिले तीनवटै पार्टी मिलेर प्रदेशमा सरकार बनाउनुपर्छ भन्ने प्रस्ताव आइरहेको छ। तर हामीले भन्यौं यो गलत हो, यसो गर्नु हुँदैन। यसो गरिए नागरिकले दिएको म्यान्डेटभन्दा फरक हुन्छ,” सभापति थापाले भने।

प्रतिपक्षविहीन प्रदेश सभाको खतरा
सभापति थापाले प्रमुख दलहरू सबै सरकारमा सहभागी हुनु भनेको प्रदेश सभालाई प्रतिपक्षविहीन बनाउनु रहेको तर्क गरे। संसद् र प्रदेश सभामा बलियो प्रतिपक्षको भूमिका हुनुपर्नेमा जोड दिँदै उनले सत्ताकै लागि मात्र राजनीति गर्न नहुने बताए।
बागमती प्रदेश सरकारको भविष्यबारे कार्यकर्ताले सोधेको प्रश्नको जवाफ दिँदै उनले भने, बागमती सरकार के हुन्छ भनेर साथीहरूले यहाँ सोध्नुभएको छ, कांग्रेस सिद्धान्तमा सम्झौता गर्दैन।

विगतका राजनीतिक समीकरणप्रति आत्मसमीक्षा गर्दै थापाले सत्ता केन्द्रित राजनीतिका कारण जनतामा निराशा पैदा भएको स्वीकार गरे। “त्यसो गर्दा सरकारमा बस्न कांग्रेसलाई प्राप्त होला, तर त्यो सरकारमा बस्नैपर्छ र सत्ता नै सबैकुरा भन्ने सोचले हामीलाई २०७२ सालदेखि कहाँ पुर्‍यायो?,” उनले प्रश्न गरे। एउटा दलसँग मिलेर चुनाव लड्ने र अर्कोसँग मिलेर सत्ता बनाउने प्रवृत्ति गलत छ।
को सत्तापक्ष र को प्रतिपक्ष भन्ने नै छुट्याउन नसकिने अवस्था सिर्जना भएको छ।

सत्तालाई मात्र केन्द्रमा राख्दा छिटो-छिटो सरकार बन्ने र भत्कने शृङ्खला चलिरहेको छ।अहिलेको नेपाली कांग्रेसले आफ्नो सोच र प्राथमिकता बदल्न खोजेको दाबी गर्दै उनले पार्टी अब सत्ताको छिनाझपटी भन्दा पनि सिद्धान्त र नागरिकको म्यान्डेट अनुसार अघि बढ्ने स्पष्ट पारे।

July 19, 2026
सरकारका निर्णयले लाभ होइन हानि गर्छ भने त्यस्ता निर्णय परिवर्तन हुन्छन् : सभापति लामिछाने

काठमाडौँ। सभापति रवि लामिछानेले सरकारले जनतालाई हानि गर्ने निर्णय भएमा ती निर्णयहरू परिवर्तन गरिने स्पष्ट पारेका छन्।
उनले सरकारको नियतमा कुनै शंका नरहेको र किसान, मजदुर तथा सर्वसाधारणको पक्षमा काम गरिने बताए।

लामिछानेले पार्टीले अभिभावकत्वको भूमिका कहिल्यै छोड्दैन भन्दै गलत निर्णय तत्काल सच्याउने प्रतिबद्धता जनाए।
काठमाडौँ — सत्तारुढ राष्ट्रिय स्वतन्त्र पार्टीका सभापति रवि लामिछानेले सरकारले लिने निर्णयले जनतालाई लाभ नभई हानि गर्ने देखिएमा परिवर्तन गरिने बताएका छन् । सरकारको अभिभावक पार्टी भएकाले त्यो जिम्मेवारी लिनबाट कहिले पछि नहट्ने सभापति लामिछानेको भनाइ थियो।

रौतहट जिल्लामा विभिन्न पार्टीमा रहेर काम गरेका नेताहरूलाई शुक्रबार रास्वपामा प्रवेश गराउने क्रममा पार्टी संसदीय दलको कार्यालय सिंहदरबारमामा भएको कार्यक्रममा सभापति लामिछानेले सरकारको नियत सही रहेको भन्दै काम गर्दै जाँदा गलत निर्णय भएमा परिवर्तन गरिने बताएका हुन्।

सरकारले किसान, मजदुर, सर्वसाधारण जनताको पक्षमा काम गर्ने सभापति लामिछानेको भनाइ थियो। ‘सरकारको नियतमा कुनै पनि शंका छैन। निर्णयहरूमा कहिलेकाहीँ समस्या आउन सक्छन् । त्यसमा करेक्सन गर्न सकिन्छ । नियत खराब भयो भने कहाँ करेक्सन गर्ने ? नियत करेक्सन गर्न गाह्रो हुन्छ।

हजारौं निर्णय गर्दा दुईचार वटा निर्णयलाई विवादमा ल्याउन सक्छ मान्छेले,’ सभापति लामिछानेले भनेका थिए, ‘व्यावहारिक रुपमा जसका लागि लाभ होस् भनेर सरकारले निर्णयहरू गरेको छ त्यो निर्णयहरूले लाभ होइन हानि भएछ भने त्यस्ता निर्णयहरू परिवर्तन हुन्छन्।’ सरकारले किसानका लागि भनेर गरेको निर्णय कार्यान्वयनमा जाँदा व्यावहारिक रूपमा विपक्षमा हुन गए परिवर्तन गरिने उनको भनाइ थियो।

सरकारले गरेका केही निर्णय कालान्तरमा परिवर्तन गर्नुपर्ने र केही निर्णय प्रभावको आधारमा तत्काल परिवर्तन गर्नुपर्ने अवस्था पनि आउने सभापति लामिछानेको भनाइ थियो। ‘केही कामहरू त्यसले धेरै ठूलो ड्यामेज गर्यो भने त्यसलाई रातारात परिवर्तन पनि गर्नुपर्छ,’ उनले भने।
सरकारले जनता जोगाउनका लागि गरेका निर्णयको स्वागत गरिएको पनि सभापति लामिछानेको भनाइ थियो।

विगतका सरकारका पालामा भएका भए पनि त्यस्ता निर्णयलाई कार्यान्वयनमा जोड दिइएको उनको भनाइ थियो। ‘सरकारले लिएको नीति किसानलाई अप्ठ्यारो पार्ने, मजदुर वर्गलाई अप्ठ्यारो पार्ने, गरीखाने वर्गलाई अप्ठ्यारो पार्ने कालान्तरमा देखिएको खण्डमा यसका कुनै नीतिहरू परिवर्तन हुन्छन्, यो अपरिवर्तनीय कुरा होइन,’ उनले भने, ‘यो तपाईंको पार्टी हो, तपाईंको अधिकार छ, आफू हुँदाहुँदै आफ्नो पार्टी गलत बाटोमा गयो भने खबरदार भन्ने जिम्मा तपाईंको ह। ताली बजाउने मात्र होइन औँला उठाएर खबरदार गर्ने जिम्मेवारी पनि आजबाट तपाईंहरूको काँधमा आएको छ।’

पार्टीका सांसदहरूले आफ्ना एजेन्डा सम्बन्धित मन्त्रालयमार्फत अगाडि बढाउनुपर्ने र ती काम हुनुपर्ने पनि सभापति लामिछानेको भनाइ थियो। ‘आज तपाईंले भन्नुभएका कुराहरू मैले वर्णन गरेको छु र यसलाई अझ औपचारिक रुपमा पत्र मार्फत सांसदहरूले सम्बन्धित मन्त्रालयलाई, सम्बन्धित मन्त्रीलाई ध्यानाकर्षण गराउनुहुनेछ,’ उनले भने,’ त्यो मन्त्रालयबाट गरिएको ध्यानाकर्षणमा काम कारबाही भएन, सही छ,नागरिकमुखी छ तर पनि मन्त्रीहरूबाट या मन्त्रालयबाट भएन भने पार्टी छ। पार्टीले आफ्नो अभिभावकत्व लिनबाट कहिले पछि हट्दैन चिन्ता नलिनु होला, पार्टी अभिभावक हो।’

त्यस्तै, रास्वपा सभापति लामिछानेले प्रतिनिधिसभाको २०८२ को निर्वाचनमा पहाडका मतदाताले पुराना पार्टीलाई छोडेको र मधेशका मतदाताले जातीय राजनीतिलाई छोडेको बताए । ‘यसपटक हामीले के भन्ने गर्‍या छौं भने पहाडले पार्टी छोड्यो, मधेशले जाति छोड्यो, जातिगत राजनीति भएन, पहाडमा पनि पार्टीगत राजनीति भएन,’ उनले भने।

July 19, 2026
बञ्चरेडाँडा ल्यान्डफिल साइटको आयु बढाउन काठमाडौँ महानगरको नयाँ रणनीति

काठमाडौँ। काठमाडौँ महानगरपालिकाले उपत्यकाको फोहर व्यवस्थापनस्थल बञ्चरेडाँडा ल्यान्डफिल साइटको आयु बढाउन र यसलाई दिगो रूपमा सञ्चालन गर्न अन्य स्थानीय तहहरूसँग ‘वित्तीय साझेदारी’ गर्ने अवधारणा अघि सारेको छ। फोहरको वैज्ञानिक व्यवस्थापन र व्यवस्थापनस्थलको भार कम गर्ने उद्देश्यले महानगरले यो कदम चाल्न लागेको हो।

कामपा कार्यवाहक प्रमुख सुनिता डंगोलका अनुसार फोहर व्यवस्थापनलाई थप सहज बनाउन स्रोतमै वर्गीकरण गरी बञ्चरेडाँडा पुग्ने फोहरको मात्रा घटाउने विधि र प्रक्रियालाई महानगरले तीव्र रूपमा कार्यान्वयन गरिरहेको छ।

”ल्यान्डफिल साइट र त्यस क्षेत्रको पूर्वाधार एवं सामाजिक क्षेत्रका कार्यक्रमका लागि महानगरले वार्षिक करिब १ अर्ब रुपैयाँ खर्च गर्दै आएको छ। पछिल्लो समय सहरबाट उत्पादित फोहरलाई स्रोतमै वर्गीकरण गरी ल्यान्डफिल साइटमा जाने फोहरको भार घटाउने कार्यलाई हामीले प्राथमिकता दिएका छौँ, डंगाेलले भनिन।

५० प्रतिशत वित्तीय जिम्मेवारी लिन महानगर तयार
महानगरपालिकाले फोहर उत्पादनको भारका आधारमा उपत्यकाका अन्य स्थानीय तहहरूसँग वित्तीय साझेदारीको अपेक्षा गरेको छ। यस व्यवस्थाले सम्बन्धित स्थानीय तहहरूलाई आफूले उत्पादन गरेको फोहरप्रति अपनत्वबोध गराउने महानगरको विश्वास छ। काठमाडौँ

महानगरपालिका क्षेत्रमा तुलनात्मक रूपमा बढी फोहर उत्पादन हुने भएकाले कुल वित्तीय जिम्मेवारीको करिब ५० प्रतिशत हिस्सा आफैँ बेहोर्न तयार रहेको कार्यवाहक प्रमुख डंगोलले स्पष्ट पारिन्।

दिगो व्यवस्थापनका लागि प्राविधिक छलफल
ल्यान्डफिल साइटको दीर्घकालीन उपयोगका लागि फोहर वर्गीकरण, पुनःप्रयोग (Reuse) र पुनःचक्रीय प्रयोग (Recycle) विधिको प्रवर्द्धन गर्ने विषयमा सरोकारवालाहरूबीच सघन छलफल सुरु भएको छ।

यसै सन्दर्भमा बञ्चरेडाँडा ल्यान्डफिल साइटको आयु बढाउन के-कस्ता आधुनिक उपाय र प्रविधिहरू अपनाउन सकिन्छ भन्नेबारे काठमाडौँ महानगरपालिकाले सहरी विकास तथा भवन निर्माण विभागका महानिर्देशक इन्जिनियर रवीन्द्र बोहोरासहितका पदाधिकारी र वातावरण व्यवस्थापन विभागका अधिकारीहरूसँग विशेष छलफल समेत गरेको छ।

हाल काठमाडौँ उपत्यकासहित काभ्रेपलाञ्चोक, नुवाकोट र धादिङका विभिन्न स्थानीय तहमा उत्पादन हुने फोहर बञ्चरेडाँडामा व्यवस्थापन गरिँदै आएको छ।

July 19, 2026
अखिल नेपाल ब्युटीसियन श्रमिक संघको तेस्रो स्थापना दिवस सम्पन्न, सीप विकास तालिममा जोड

काठमाडौं। अखिल नेपाल ब्युटीसियन श्रमिक संघले आफ्नो तेस्रो वार्षिक स्थापना दिवस विभिन्न कार्यक्रमका साथ भव्य रूपमा सम्पन्न गरेको छ। सिल्क हेयर कम्पनीको सहकार्यमा आयोजित कार्यक्रममा सौन्दर्यकर्मीहरूको पेशागत क्षमता अभिवृद्धि, श्रमिक अधिकारको संरक्षण तथा संगठनात्मक एकतालाई थप सुदृढ बनाउने उद्देश्यका साथ सीप विकाससम्बन्धी विशेष तालिम सञ्चालन गरिएको आयोजकले जनाएको छ।

संघकी अध्यक्ष सावित्रा आचार्यको अध्यक्षतामा सम्पन्न कार्यक्रममा अखिल नेपाल ट्रेड युनियन महासंघ (अन्टुफ) का अध्यक्ष जगत सिंखडा प्रमुख अतिथिका रूपमा सहभागी हुनुभएको थियो। विशेष अतिथिका रूपमा अन्टुफ महिला कमिटीकी अध्यक्ष सुसिला पुन, कस्मेटोलोजिस्ट परिसी कारञ्जीत, छाला विशेषज्ञ डा. सरोज लामिछाने तथा सिल्क हेयर कम्पनीका प्रबन्ध निर्देशक रक्की लामा सहभागी हुनुभएको थियो।

कार्यक्रममा अन्टुफका महासचिव शालिकराम काफ्ले, उपमहासचिव शिव पोखरेल, उपमहासचिव रामचन्द्र कार्की, वरिष्ठ ब्युटीसियन तथा विभिन्न क्षेत्रका सौन्दर्यकर्मीहरूको उल्लेखनीय उपस्थिति रहेको थियो।

स्थापना दिवसका अवसरमा स्वागत मन्तव्य, सांस्कृतिक प्रस्तुति, शुभकामना आदानप्रदान तथा मायाको चिनो प्रदान गर्ने कार्यक्रमसमेत आयोजना गरिएको थियो। साथै ब्युटीसियनहरूको व्यावसायिक दक्षता अभिवृद्धिका लागि विशेष सीप विकास तालिम सञ्चालन गरिएको आयोजकले जनाएको छ।

संघकी महासचिव स्मृति रावतले सञ्चालन गर्नुभएको कार्यक्रममा शोभा अर्याल, लक्ष्मी महत, गंगा नकर्मी, सुमा चित्रकार, कुमारी सिद्ध, सरस्वती नकर्मीलगायतको सक्रिय सहभागिता रहेको थियो।

आयोजकका अनुसार स्थापना दिवसको अवसरमा आयोजित कार्यक्रमले ब्युटीसियन तथा सौन्दर्यकर्मीहरूको पेशागत एकता सुदृढ गर्नुका साथै श्रमिक अधिकारको संरक्षण, सीप विकास र व्यवसायिक उन्नयनमा सकारात्मक योगदान पुग्ने विश्वास व्यक्त गरिएको छ।

उत्साहपूर्ण सहभागिताबीच सम्पन्न कार्यक्रमले संगठनलाई अझ सशक्त र क्रियाशील बनाउने प्रतिबद्धता पनि व्यक्त गरेको आयोजकले जनाएको छ।

July 18, 2026
मन्त्रीहरूलाई राजीनामा दिन एमालेको निर्देशन

काठमाडौ। बागमती प्रदेशका नेकपा एमालेका मन्त्रीहरूलाई सरकारबाट राजीनामा दिएर बाहिरिन निर्देशन दिइएको छ। नेपाली कांग्रेस र नेकपा एमालेबीचको सत्ता गठबन्धनमा दरार पैदा भएपछि एमाले संसदीय दलका नेता जगन्नाथ थपलियाले सरकारमा सहभागी मन्त्रीहरूलाई तत्काल राजीनामा दिन निर्देशन दिनुभएको हो।

संसदीय दलका नेता थपलियाका अनुसार मन्त्रीहरूले समय अनुकूल मिलाएर मुख्यमन्त्री इन्द्रबहादुर बानियाँसमक्ष आफ्नो राजीनामा बुझाउने तयारी गरिरहेका छन्। राजनीतिक परिस्थितिबारे स्पष्ट पार्दै नेता थपलियाले भन्नुभयो अहिलेको बदलिएको सत्ता राजनीतिको परिस्थितिमा कांग्रेस गठबन्धनमा रहन नचाहेको बुझियो। प्रस्तुत अवस्थामा एमाले गठबन्धनमा जबरजस्त बसिरहन नपर्ने निष्कर्ष सहित मन्त्रीहरूलाई राजीनामाको निर्देशन दिएको हो।

सरकारमा एमालेको स्थिति
हाल बागमती प्रदेश सरकारमा एमालेका तर्फबाट ६ जना मन्त्रीहरू सहभागी छन्। मुख्यमन्त्री बानियाँको नेतृत्वमा हालै प्रदेशका १४ मन्त्रालयलाई घटाएर ८ वटा कायम गरिएको थियो। साउन १ गतेदेखि लागू भएको उक्त निर्णय अनुसार ८ जना मन्त्रीलाई विभागीय जिम्मेवारी दिइएको छ भने बाँकी ६ जनालाई विना विभागीय मन्त्रीका रूपमा राखिएको छ।
एमालेबाट सरकारमा सहभागी मन्त्रीहरूको विवरण यस प्रकार छ।

मन्त्रीको नाम मन्त्रालय
मधुसूदन पौडेल कृषि, पशुपन्छी, वन तथा वातावरण मन्त्री, बिन्दु श्रेष्ठउद्योग, पर्यटन, श्रम तथा यातायात मन्त्री, डा. दिनेशचन्द्र देवकोटाभौतिक पूर्वाधार विकास मन्त्री, किरण थापा मगरविना विभागीय मन्त्री,जयराम श्रेष्ठविना विभागीय मन्त्री, भरत बहादुर केसीविना विभागीय मन्त्री

केन्द्रको सत्ता समीकरण र दलहरूबीचको आन्तरिक कलहका कारण प्रदेश तहमा पनि गठबन्धन भत्किने क्रम सुरु भएसँगै बागमती प्रदेश सरकारको भविष्यलाई लिएर नयाँ राजनीतिक तरंग पैदा भएको छ।

July 18, 2026
काठमाडौँ जिल्ला अदालतद्वारा सुलभ अग्रवाल र दीपक भट्टसँग करोडौँ धरौटी माग

काठमाडौँ। काठमाडौँ जिल्ला अदालतले विभिन्न तीनवटा व्यावसायिक मुद्दामा प्रतिवादी बनाइएका व्यवसायीहरूसँग करोडौँ रुपैयाँ धरौटी माग गरेको छ। न्यायाधीश शिवप्रसाद आचार्यको इजलासले असार २४ गतेदेखि निरन्तर सुनुवाइ गर्दै ती मुद्दाहरूमा धरौटी माग गर्ने आदेश दिएको हो। अदालतको आदेशअनुसार व्यवसायी सुलभ अग्रवालसँग कुल ५ करोड ८० लाख रुपैयाँ र दीपक भट्टसँग २ करोड ५० लाख रुपैयाँ धरौटी माग गरिएको जिल्ला अदालत काठमाडौँका सूचना अधिकारी शिव खतिवडाले जानकारी दिए।

१. बीमा ऐन २०७९ अन्तर्गतको कसूर:नेपाल बीमा प्राधिकरण कुपण्डोलको जाहेरीअनुसार दर्ता भएको यस मुद्दामा दीपक कुमार श्रेष्ठसहित ४२ जनालाई प्रतिवादी बनाइएको छ। यसमा अदालतले सुलभ अग्रवालसँग २ करोड रुपैयाँ र दीपक भट्टसँग १ करोड ५० लाख रुपैयाँ धरौटी माग गरेको छ।

२. नेपाल धितोपत्र बोर्डसँग सम्बन्धित मुद्दा:धितोपत्र बोर्डसँग जोडिएको मुद्दामा व्यवसायी सुलभ अग्रवालसँग थप २ करोड ३० लाख रुपैयाँ धरौटी माग गरिएको छ। यस मुद्दामा अग्रवालसहित २ जनालाई प्रतिवादी बनाइएको छ।

३. नेपाल माईक्रो इन्स्योरेन्स लिमिटेडसँग सम्बन्धित मुद्दा:
धितोपत्रसम्बन्धी ऐनकै अर्को कसूर (नेपाल माईक्रो इन्स्योरेन्स लिमिटेड) सँग सम्बन्धित मुद्दामा अदालतले अग्रवालसँग १ करोड ५० लाख रुपैयाँ र भट्टसँग १ करोड रुपैयाँ धरौटी माग गरेको छ। यस मुद्दामा धितोपत्र बोर्डका समिति सदस्य सुजल मल्लसहित ८१ जनालाई प्रतिवादी बनाइएको छ।

कुल धरौटी रकम:
सुलभ अग्रवाल: रु. ५ करोड ८० लाख
दीपक भट्ट: रु. २ करोड ५० लाख
निरन्तरको बहस र सुनुवाइपछि न्यायाधीश आचार्यको इजलासले प्रतिवादीहरूको व्यावसायिक पृष्ठभूमि र मुद्दाको गम्भीरतालाई ध्यानमा राख्दै उक्त परिमाणको धरौटी रकम तोकेको हो।

July 17, 2026

Choose Your Language »